3 July 2005
Sihlalo,
Sekela lakaMengameli,
Malunga weKomiti eLawulako
Ma-Comrade
Nthunywa:
Sibandamele ekuvaleni Umkhandlu wesibili weNarheni (National General Council - NGC). Ngehlangothini leKomiti yangeNarheni eLawulako (NEC), iinthunywa, nehlangano yethu mazombe, ngithanda ukuthokoza uHloko-kulu we-Yunivesithi ye-Pitori, u- Professor Callie Pistorius, abafundisi, abafundi, nabasebenzi bekoro le eqathekileko yefundo, kikho koke abakwenzileko,okube nesikhulu isandla ekuphumeleleni koMkhandlu weNarheni.
Soke, silalele kuhle khulu u-Professor Pistorius nabekasamkela e Yunivesith ye-Pitori. Udlulise umlayezo osethleni, okhulume ngendima yekoro le eqakathekileko yefundo, ifundiso nerhubhululo njengeyetjhugululo, ezibandakanya nokwakha isitjhaba esithumbako, ingidi-gidi zabantu bethu abazibandakanya nayo..
Lokhu kwenze bona sithome ngenyawo elilungileko lomsebenzi esifuze siwenze kiluMkhandlu weNarheni, khe-siqala-qale amagadango alandelako afuze athathwe yi-ANC, nayo ngokwayo efuze ifake isandla ekwakheni isitjhaba esithumbako, ingidi-gidi zabantu bethu abazibandakanya nayo.
Nginesiqiniseko sobana uMkhandlu weNarheni uzokuvuma bona nasibhala imitlolo yoMkhandlu lo, sifuze sifake ikulumo ekhuthazako ethulwe ngu-Professor Callie Pistorius.
Njengombana sicedelela umsebenzi wethu lo, ngikhuluma ngehlangothini le-Komiti eLawulako yangeNarheni (NEC), nangehlangothini lelami ibizo, ngithanda ukuthokoza khulu iinthunywa ngokuzimisela kwabo ekwenzeni umsebenzi we-NGC.
Imitlolo esiyamkeleko, naso isiMemezelo, zimkhomba-ndlela onethla ngemisebenzi esijameleko. Esiqalene nakho kuzakuba kulandelela zoke iinqunto esizithetheko, sinelemuko elizeleko leembopho zethu enarheni nebantwini bethu.
Hlangana nokhunye, umtlolo omalungana neeNdaba zokuHlela ihlangano, esiwamkeleko, ufaka hlangana nanayi indimanyana eqakathekileko:
"IsiMemezelo esifakwe endinyaneni 4.15 yoMthethosisekelo (we-ANC), ifuze ibe yincenye yeforomu yokujoyina, amalungu amatjha afuze afundelwe isifungwesi nakajoyinako."
Nginesiqiniseko sobana sizokwenza burhaba ekufezweni kwesiquntwesi esiqakathekileko soMkhandlu wethu weNarheni.
Iinthunywa mbala zinelemuko khulu ngokuthi indinyana le i- 4.15 yoMthethosiskelo wethu ithini, ngombana ngaphandle kokhunye-nje ngiyidzubhule ngokuzeleko ekuLumeni yami yokuVula. Angiyibuyelele ngiyifunde godu:
"Ngitjho ngesizotho sobana ngizokulandela iimfuno ze-African National Congress njengombana zitlolwe kuMthethosisekelo, Umtlolo weKululeko, nezinye iinkambiso ezamkelweko.
"bona ngizijoyinela ihlangano le ngokuzithandela ngokwami, ngaphandle kwehloso yokuzuza okuthileko mina ngenyamani,
"bona ngiyavuma ukuhlonipha uMthethosisekelo neenkoro nokusebenzela ihlangano le njengelunga elithembekileko,
"bona ngizakunikela ihlangano le woke amandla nekgono lami ngenze yoke imisebenzi enginikelwe yona,
"bona ngizakusebenzela ekwenzeni i-ANC ibe lithulusi elinamandla lekululeko ezandleni zabantu
"nokuthi ngizakuvikela ibumbano nokuhlonipheka neegudu zehlanghano le, ngilwisane nezinye nezinye izenzo zokuliya nobuhlandla"
Emalangeni ambadlwanyana adlulileko, siqala-qale ezinye zeendaba eziqakatheke kumbi ekusaseni lenarha yethu. Ngiyakholwa bona nasibikela isitjhaba bona siqunte sathini, abantu bethu bazokuba neenzathu zokuzindza ekutheni ihlangano yezepolitiki edosa ephambili ngenarhenapha, isabambe ngezandla nangamazinyo ekuthuthukiseni amakareko wabo, iphendule neemfunweni zabo.
Ngaphandle-nje kokungenela umhlangonokhulu kawokewonke, ukuyokwizwa eminye yemibiko ehlanganisiweko yemisebenzi yamakomitjhini ahluka-hlukeneko, njengamanye amalungu wekomiti eLawulako yangeNarheni, nami ngibe nekgonakalo lokuvakatjhela amanye amakomitjhana.
Mbala, kungikhuthazile, ukubona ngekhwalithi yemifakelo yeenthunywa ekulumiswaneni, indlela enifundisise ngayo imitlolo yekulumiswano nina ngokwenu ma-comrades. Ngaphezu kwalokho, kube sethleni kimi bona ngokukhamba kwesikhathi, nenze imizamo emihle yokutholisisa iindaba erhelweni le-NGC, begodu nobujamo ekungibo enarhenapha esifuze sibutjheje.
Ngithokoza khulu ukudlulisa umlayezo wakwamkela wabarholi nehlangano yethu mazombe, imizamo yenu, malunga wehlangano le, eniyenzileko yokuziphatha njengamalunga wamambala we-African National Congress, iinthunywa zetjhuguluko eliphambili ezidingwa babantu netjhuguluko lentando yenengi.
Kuzizwa kamnandi ngizindzile ngizikhakhazisa khulu ukwazi bona sinamalunga azimbusiso emalungwini wo-Mkhonto we Sizwe nathi-sisebenzela abantu be-Sewula Afrika!
Nginesiqiniseko sobana nasingafeza iinqunto zokuthuthukiswa kwamalungu okuvele ekomitjhaneni ebikhulumisana ngendaba eqakathekileko le, sizokuphumelela ukuya phambili ukwakha i-ANC ibe lithulusi letjhuguluko eliphambili elifunwa ngesiqalene nakho.
Isifungo esidzubhulwe Mkhandlu weNarheni, sokuba yincenye yeforomu yokujoyina, esifuze sifundelwe amalungu amatjha nakajoyinako, sithi amalungu wethu azibandakanya "ekusebenzeleni ukwenza i-ANC ibe lithulusi elinamandla lekululeko ezandleni zabantu".
Ukufeza lomnqopho, kutjhukuthi thina, malungu we-ANC, sifuze sizibone siziphathe njengencenye yethuluseli eliqakathekileko lekululeko elisebenzela neliyincenye yesitjhaba sabantu bakithi.
Lokhu kutjhukuthi, ngokutjho okuzeleko kwamezwi la, sifake ngaphakathi iingudu zobana sijoyine ihlangano le ngokwethu, ngaphandle kwehloso yobujamo bokuzuza okuthileko ngokwethu njengokutjho kwesifungo sethu.
Ukuthumba kwethu kwentando yenengi okube yinqopha-mlandu, kubeke ihlangano yethu ebujamemeni bamandla wezepolitiki. Ukusukela ngo-1994, umnyaka wama-82 kwabelethwa ihlangano yethu, abantu bethu basinikele umyalo wokuba yihlangano ebusako.
Ukuba yihlangano ebusako kutjhukuthi sinesandla epahleni yombuso. Kutjhukuthi, labo abafuna ukusebenza nombuso, bafuze bathintane nalabo abalawula amandla wombuso, amalungu wehlangano yethu abamalungu karhulumende. .
Kutjhukuthi thina esisebenza eenkorweni zombuso, sinekgono lokuthenga abalandeli nabantu esifuna basisekele. Ngalokho-ke kutjhukuthi, sinekgono lokuthenga abakhambisana nathi, singasaqala nakuqala iingudu ezikhambisana neziqatheke khulu ze-African National Congress.
Koke lokhu kwenza ilawulo lombuso libe nethla khulu. Kwenza bona ubulunga be-ANC bube yindlela elula yokulawula umbuso. Kwenza bona ube sebujameni obuhle beemali ngokuba lilunga le-ANC. Kwenza ukusekelwa ngemali kwe-ANC kubekubhanka kilabo abafuna ukwandisa inzuzo yabo ngokuthi basebenzisane norhulumende.
Akukho nakhunye okutjha kilokho eenthunyweni zoMkhandlu wenarheni. Ngalesi sizathu, i-NGC ivumeli bona emitlolweni yethu, sifuze sitjengise ukuphikisana nobukhohlakali, sivuselele nokuzibandakanya kwethu nokubulwisa.
Iinthunywa zikhulume ngeenqunto esazithathako ekonferensini yeNarheni yama-50 eyabanjelwa e-Mafikeng ngo-1997, lapho, hlangana nokhunye, sathi:
"Ubukhohlakali buyithinta kumbi khulu ituthuko, ngalokho kwenza bona umthlago wande. Ubukhohlakali buthathela phasi khulu itjhuguluko lentando yenengi"
Iphendula kilokho, i-NGC kwanje iqunte bona, ngabomu, bona thina soke, amalunga we-ANC, sifuze sizibandakanye nesiFungo sethu, ngokuthi "sizakukhambisana neminqopho njengombana itlolwe eMthethosisekelweni, Umtlolo wekululeko, nezinye iinkambiso...zijoyinele ihlangano le ngokwethu, ngaphandle kwehloso yokuzuza, ukuvuma nokuhlonipha uMthethosisekelo namakoro wayo, ukusebenza njengelunga elithembekako lehlangano"
Ekulumiswaneni yethu, sivumelene kuhle samkela iqiniso lobana nanyana kunepumelelo engaka esiyenzileko eminyakeni eli-11 edlulileko, usesemkhulu umsebenzi esisafuze siwenze ngaphambi kobana singaphumelela ekucedeni umthlago owatjhiywa makhulu-weminyaka yobukoloniyali nombuso webandlululo.
Emakomitjhini, iinthunywa zenze iimphakamiso ezinengi nezinabileko malungana namagadango esifuze siwathathe wobana sirhabise irhelo lokwakha ipilo encono yabo boke, nokwakha umphakathi osekwe babantu. Lokhu kurhunyezwe emitlolweni esiyamkeleko.
Imitlolo le itjengisa iinqunto zehlangano yethu zokufeza iimbopho zethu esizenze ebantwini. Ikhuluma ngokunengi okuqalene nesitjhaba - umthlago, ukuthlayela kwemisebenzi , ukungabi nehlabathi, nezindlu, amagulo, ukutlhoga ilwazi, ubelelesi nokhunye.
Ngetjisakalo yokuphendula iinrhuluphelo zabantu bethu boke, abanzima nabamhlophe. Besaqunta nangokuthi sifuze siphendule izinga lobujamo bethu bendabuko emitlolweni ye-Strategy and Tactics, bona buyakhambisana, kobana i-Sewula Afrika ngeyabo boke abaphila kiyo, abanzima nabamhlophe.
UMkhandlu lo weNarheni neenqunto zawo, zifumana ukuqakatheka eqinisweni lokuthi zithinta bunjani ikusasa lenarha nabantu bakithi. Nanyana zingaba zihle kangangani iinqutwezi, naziqalwa ephepheni , isitjhaba sabantu bakithi, sinelungelo elinye nelinye lokujamisa ikolo yaso yobana sizozifeza na, bekufike isikhatheso lapho zifezwa khona. Kodwana, esingazithabisa kikho, ngukuthi abantu bakithi basaragela phambili ngokuba nehliziyo yethemba elikhulu ehlanganweni yethu.
Njengombana sizokuphuma nje sitjhinge emagatjheni wethu, eemfundeni nemaprovinsini wethu, sifuze, ngezenzo zethu, siragele phambili ngokutjengisa abantu bakithi bona ukusethemba kwabo kulungile. Hlangana nokhunye, sifuze siqinisekise bona sithintana mathupha nabantu, ngaso soke isikhathi sikgone ukuphendula iindingo zabo, sibabuthulele bajoyine ijima lokwakha butjha netuthuko, esikhulume ngakho eMtlolweni wamaKhetho waphambilini.
Emlandwini wayo, ihlangano yethu yahlangabezana neenkhathi ezinzima. Iphume eenkhathinezo inamandla ngonobangela wokuthembeka kwayo eengudwini zayo, ikgono layo lokusebenzisana ngebumbano begodu nokuzibandakanya kwayo emnqopheni munye nje kwaphela, ngokuthi usebenzele abantu be-Sewula Afrika.
Ngokweqiniso, uMkhandlu weNarheni uphefumule ngokusekela kwawo iPhini laka Mongameli wethu, esikhathini esimbesi nesibuhlungu. Godu, sigandelele nephuzu eliqakathekileko ngakwezobulungiswa, lobana ufuze abe nethuba lokuzivikela kikho akhonjwe ngakho.
Sibumbene soke kilezi ngudu, simjoyine ethembeni lakhe lobana irherho lezobulungiswa ngeze liriyadiswe ngaphandle kwesidingo.
Ngithanda ukubawa woke amalunga wethu, bona sisajemele imiphumela yerherhweli, sifuze siziphathe ngendlela enesithunzi efanele amalunga we-African National Congress, begodu sikhambisane nangesiko lehlangano yethu, ehlonitjhwa nethandwa mbala babantu bakithi.
Singaziphathi ngendlela engehlisa isithunzi sePhiini laka Mongameli nehlangano yethu. Mbala kungaso sona lesisikhathi esibudisi esifana nalesi, lapho siqalene nokuthi siziphathe njengamalunga wamambala we-ANC, amalunga angenza nanyana khuyini ukugcina isithunzi, ibumbano nokunamathelana.
UMkhandlu weNarheni usinikele imisebenzi eminengi. Usitjengise umhlahla-ndlela wobana sirhabise khulu irherho lokwakha butjha netuthuko. Usitjengise bona sisebenza ngamandla, ekuqinisweni kwesivumelwano sabantu sokurhabisa imibono yoMtlolo weKululeko. Usibandakanye nokuthi sandise isandla sethu emzabalazweni oragela phambili wokuvuselelwa kwe-Afrika.
Usitjengise bona silivikele khulu-khulu ibumbano lehlangano yethu nelabaBambisani bethu. Usilayele bona sifuze sitjhinge phambili sisoke, njengenyanda ebumbeneko, sisebenzele iinrhuluphelo zabantu bakithi be-Sewula afrika nabe-Afrika, besililisane nazo zoke iinhlangano zamano wepumelelo ephasini mazombe.
Isphetho somsebenzi wethu eMkhandlwini weSibili wenarheni, ngukuthi sitswaywe ngesikhathi lapho sithoma ukufeza iinqunto esizenzileko. Ngithemba bona, malungana nalokhu, asizudanisa okulindelwe babantu bethu.
Ngehlangothini leKomiti eLawulako yangeNarheni (NEC), ngifisela zoke iinthunywa ikhambo eliphephileko, begodu ngimemezele nangokuvalwa koMkhandlu weSibili wenarheni.
Amandla!