3 Fulwana (July) 2005
Mudzulatshidulo,
Muthusa Muphuresidennde,
Mirado ya Khorotshitumbe Ya Lushaka,
Vharumelwa:
Ri tsini na u bvala National General Council (NGC) yashu ya vhuvhili. Ndi tama u livhuwa Thoho ya Yunivesithi Vho-Professor Callie Pistorius, vhashumi na vhagudiswa vha ino yunivesithi. Ndi livhuwa zwothe zwe vha ri itela. Zwe vha ita zwo ita uri mutangano uyu wa National General Council u tshimbile zwavhudi. Ndi vha livhuwa ndo imela vharumelwa na dzangano lashu lothe.
Rothe ro thetshelesa zwo ambiwaho nga Vho- Professor Callie Pistorius musi vha tshi ri tanganedza fhano Yunivesithi nga Lavhuna. Vho rumela mulaedza u ombedzelaho ndeme ya ino yunivesithi siani la pfunzo na vhutodisisi sa dzhendedzi la tshanduko lo diimiselaho siani la u fhatwa ha lushaka lu kundaho, lushaka lu todwaho nga milioni dza vhathu.
Hezwi zwo ri nea liga la vhudi la u thoma mushumo washu we ra dela wone kha ino General Council, u sedzana na maga ane ANC ya tea u a dzhia kha u fhata lushaka lu kundaho.
Ndi a fulufhela uri National General Council i a tenda uri musi ri tshi phadaladza dzidokhumenthe dza Council, ri tea u dzhenisa na mulaedza wa ndeme we wa nekedzwa nga Vho-Professor Callie Pistorius.
Musi ri tshi khunyeledza mushumo washu, nahone ndi tshi amba ndo imela Khorotshitumbe ya Lushaka (NEC), ndi tama u livhuwa vharumelwa kha vhudiimiseli havho he vha vhu sumbedzisa kha ino NGC.
Dzidokhumenthe dze ra dzi tanganedza, hu tshi katelwa na Muano washu, ndi tsumbo ya mushumo une wa kha di vha phanda. Khaedu yashu hu do vha u vhona uri zwe ra tendelana zwone zwi a itwa, nahone zwi itwa ri tshi khou divha vhudifhinduleli hashu kha shango na vhathu vhashu.
Dokhumenthe, i kwamaho zwa Dzangano, ye ra i tanganedza, i katela maipfi a tevhelaho a ndeme:
"Muano une wa vha kha ndima 4.15 ya Ndayotewa (ya ANC) u tea u vha tshipida tsha fomo ya mirado, nahone mirado miswa i tea u vha na uyu muano musi i tshi dzhena kha dzangano"
Ndi a fulufhela uri ri do shuma nga tshihadu u vhona uri tsheo yo dzhiwaho nga ino National General Council i a itwa.
Vharumelwa vha a divha uri muano uyu, Ndima 4.15 ya Ndayotewa yashu, uri mini sa izwo ndo u topola wothe musi ndi tshi bvula uno mutangano. Ndi do dovha nda u vhala.
"Ndi ana uri ndi do tevhedza ndivho na zwipikwa zwa African National Congress sa zwe zwa bulwa kha Ndayotewa, Freedom Charter na dzinwe pholisi,
"uri ndi khou vha murado wa dzangano nga nne mune hu sina a nkombetshedzaho nahone ndi sina mihumbulo ya u dipfumisa kana u diisa ntha,
"uri ndi tenda u thonifha Ndayotewa na zwiimiswa na u shuma sa murado mufulufhedzea wa dzangano,
"uri ndi do shuma nga hune nda kona u itela dzangano na u ita zwine nda vhudzwa uri ndi zwi ite,
"uri ndi do shuma nga hune nda kona u vhona uri ANC i vha dzhendedzi li shumaho zwavhudi la mbofholowo nahone line la vha zwandani zwa vhathu,
"na uri ndi do tsireledza vhuthihi na vhuvha ha dzangano na zwipikwa zwalo, nda dovha nda lwisa mikhwa ya khudano na u fhandekana."
Maduvhani a si gathi o fhiraho ro sedzana na zwithu zwinzhi zwine zwa vha zwa ndeme kha vhumatshelo ha shango lashu. Ndi a fulufhela uri musi ri tshi vhiga kha lushaka tsheo dze ra dzhia, vhathu vhashu vha do takala uri dzangano li rangaho phanda shangoni lashu li kha di vha lo diimisela u shumela vhathu na u vha thetshelesa.
Nga nnda ha u dzula na u thetshelesa mivhigo na zwi ambwaho kha dzikhomishini dzo fhambanaho, nne, u fana na minwe mirado ya Khorotshitumbe ya Lushaka, ndo kona u dalela na u thetshelsa zwi ambwaho kha dzinwe dzikhomishini.
Zwo vha zwi nyanyulaho u vhona u shela mulenzhe he ha vha hu ngomu nga vharumelwa kha nyambedzano dzo sumbedzaho uri vhoiwe, comrades, no vhala mabambiri a nyambedzano. Zwi dovha zwa vha khagala uri no difha tshifhinga u pfesesa zwithu zwe zwa ambiwa ngazwo kha NGC na zwikwamaho shango lashu zwine ra tea u shumana nazwo.
Ndi pfa ndo huliswa uri ndi fhirisele dakalo la vhurangaphanda na la dzangano lashu lothe kha vhoiwe kha mushumo mungafha we na u ita, nge na difara sa vhahali vha vhukuma vha African National Congress, na dovha na vha madzhendedzi a tshanduko ine vhathu vhashu na tshanduko ya dimokirasi ya lushaka vha i toda.
Ndi pfa ndo takala na u dihudza u divha uri ri na mirado ine ya nga kona u tshimbila mutalani wa vhahali vha Umkhontho we Sizwe nahone vhane vha nga dirwa khana vha amba uri - ri shumela vhathu vha Afrika Tshipembe!
Ndi a tenda uri arali ra ita zwe ra tendelana zwone siani la mveledzisophanda ya mirado, ri do kona u fhata ANC u vha dzhendedzi la mvelaphanda na tshanduko line la sedzana na khaedu dzi daho.
Muano we National General Council ya amba uri u tea u vha tshipida tsha fomo dza u vha murado wa dzangano u amba uri mirado yashu i tea u dikumedza "u vhona uri ANC i shuma zwi ngomu u vha dzhendedzi la mbofholowo line la vha zwandani zwa vhathu".
U swikelela tshipikwa itshi, rine mirado ya ANC, ri tea u vha na vhudifari ha vhudi sa tshipida tsha ili dzhendedzi la mbofholowo li shumelaho vhathu la dovha la vha tshipida tsha vhathu vhashu.
Hezwi zwi amba uri ri tea u vhona uri zwipikwa zwashu zwi a nwelela kha rine uri ri humbule muano we ra u dzhia musi ri tshi vha mirado ya dzangano hu sina we a ri kombetshedza nahone ri sina mihumbulo ya u dipfumisa kana u diisa ntha, sa zwine Muano wa ambisa zwone.
Gundo lashu la dimokirasi lo vhea dzangano lashu kha vhuimo ha maanda siani la zwa politiki. Vhathu vhashu vho ri nea maanda a u vhusa u tou bva nga 1994 nwaha we wa vha wa u pembelela minwaha ya 82 ya u vha hone ha dzangano lashu.
U vha lihoro livhusi zwi amba uri ri na tswikelelo kha zwiko zwa muvhuso. Zwi amba uri avho vhane vha tama u ita vhubindudzi na muvhuso vha tea u shumisana na na avho vhane vha vha vha na maanda a muvhuso, mirado ya dzangano lashu vhane vha shumaho kha muvhuso.
Hezwi zwi amba u ri nga nthani ha maimo a ne ra vha nao muvhuson, ri nga ita u ri vhathu vha ri luvhe musi vha tshi toda zwinwe kha muvhuso. Zwi amba uri vhanwe vhashu vhane ra shuma muvhusoni ri na tshikhala tsha u renga vhathu. Hezwi zwi amba uri ri nga fhedza ri tshi khou diwana ri dzhia budo li sa tshimbidzani na mitheo ya African National Congress.
Hezwi zwi amba uri ndangulo ya muvhuso ndi ndangulo ya maanda. Zwi ita uri u vha murado wa ANC i vhe yone ndila i leluwaho ya u swikela ndangulo ya maanda a muvhuso. Zwi ita uri u vha murado wa ANC zwi vhe ndila i leluwaho ya u vha mubindudzi. Zwi disa thikhedzo ya zwa masheleni na vhubindudzi kha avho vha todaho u dipfumisa nga u ita vhubindudzi na muvhuso.
Zwothe zwo bulwaho a si zwiswa kha vharumelwa vha National General Council. Ndi ngazwo NGC yo tenda uri ri tea u ombedzela kha dokhumenthe dzashu uri ari imi na tshandanguvhoni nahone ri nndwani ya u lwisa tshandanguvhoni.
Vharumelwa vho amba nga ha zwe zwa tendelaniwa kha Khonferensi yashu ya Lushaka ye ya farelwa Mafikeng nga 1997, he ra amba uri:
"Tshandanguvhoni tshi khakhisa mvelaphanda, tsha fhedza tshi khou ita uri tsiku i ande. Tshandanguvhoni tshi khukhulisa zwipikwa zwa Tshanduko ya Lushaka ya Dimokirasi."
NGC yo dzhia tsheo ya uri rothe mirado ya ANC, ri tea u dikumedza kha Muano washu uri ri do tevhela ndivho na zwipikwa zwa African National Congress sa zwe zwa bulwa kha Ndayotewa, Freedom Charter na dzinwe pholisi, uri ndi khou vha murado wa dzangano nga nne mune hu sina a nkombetshedzaho nahone ndi sina mihumbulo ya u dipfumisa kana u diisa ntha, uri ndi tenda u thonifha Ndayotewa na zwiimiswa na u shuma sa murado mufulufhedzea wa dzangano".
Kha nyambedzano dzashu ro tenda uri naho huna zwinzhi zwe ra zwi swikela minwahani ya 11 yo fhiraho ri kha di vha na mushumo munzhi une ra tea u u ita phanda ha musi ri tshi nga fhelisa masiandoitwa a colonialism na apartheid.
Vharumelwa vho ita midzinginyo minzhi kha dzikhomishini. Midzinginyo iyo i kwama maga ane ra tea u a tevhela u itela thavhanyiso ya u fhatwa ha vhutshilo ha khwine ha vhothe na u fhata lushaka lwa vhathu. Hezwi zwo nweledzwa kha dzidokhumenthe dze ra dzi tanganedza.
Dokhumenthe idzi dzi sumbedzisa vhudiimiseli ha dzangano lashu kha zwe ra fulufhedzisa vhathu vhashu. Dzi amba nga khaedu dzo sedzanaho na vhathu vhashu - khaedu dza tsiku, thogeo ya mishumo, mvelamurahu, thogeo ya mavu, malwadze, thogeo ya ndivho, vhutshinyi, na zwinwe.
Sa dzangano li todaho u shumana na thodea dza vhathu vhashu, vharema na vhatshena, ro dzhia tsheo ya u sedza uri ri tea u vhona uri mihumbulo yashu kha Dokhumenthe ya Kushumele na Kuitele (Strategy and Tactics) i tshimbidzana na mitheo ye ra newa yone nga Freedom Charter, ine ya ri Afrika Tshipembe ndi shango la vhothe vha tshilaho khalo, vharema na vhatshena.
Ino National General Council na tsheo dzayo zwi wana vhudi hadzo kha uri dzi do kona u tutuwedza vhumatshelo havhudi ha shango lashu na vhathu vhalo. Fhedzi naho hu uri tsheo idzi ndi dzine dza vha na mudzio, vhathu vhashu vha na pfanelo ya u tanzwa mato vha sedza u swikela musi zwe zwa tendelaniwa zwi tshi itwa. Fhedzi tsha ndeme ndi tsha uri vhathu vhashu vha kha di fulufhela dzangano lashu.
Musi ri tshi humela matavhini, madzinguni na mavunduni ashu, ri tea u sumbedzisa nga zwiito zwashu uri fulufhelo line vhathu vhashu vha vha nalo kha rine ndi lone lone. Ri tea u vhona uri ri dikwamanya na vhathu tshifhinga tshothe uri ri kone u shumana na thodea dzavho na u vha kuvhanganya u vha mmbi ya mvusuludzo na mvelaphanda ye ra amba ngayo tshifhingani tsha khetho dzo fhiraho.
Dzangano lashu lo tangana na zwinzhi zwi kondaho kha divhazwakale yalo. Fhedzi tshifhinga tshothe lo vha mukundi nga nwambo wa vhudiimiseli halo kha mikhwa yalo, vhukoni halo siani la vhuthihi na vhudiimiseli halo kha tshipikwa tshithihi, tshipikwa tsha u shumela vhathu vha Afrika Tshipembe. National General Council yo sumbedzisa thikhedzo yayo kha Muthusamuphuresidennde washu kha zwino zwifhinga zwi kondaho. Ro dovha ra ombedzela uri ndi zwo teaho uri Muthusamuphuresidennde vha newe tshikhala tsha u ditsireledza kana u diambela khothe kha zwothe zwine vha khou pomokwa zwone.
Rothe ri nanda nthihi nahone ri navho kha u fulufhela uri vhukando ha mulayo vhu nga si ongolowe zwi songo tea.
Ndi tama u ita khuwelelo kha mirado uri musi ro lindela uri mulayo u dzhie vhukando, ri tea u difara nga ndila yo teaho yo fanelaho mirado ya African National Congress nahone i tshimbidzanaho na sialala ya dzangano line vhathu vhashu vha li thonifha vha dovha vha li funa na u li tama.
Ri tea u vhona uri a ri iti zwithu zwine zwa nga fhedza zwi tshi khou vhaisa vhuvha ha Muthusamuphuresidennde na ANC. Ndi nga zwifhinga zwi fanaho na izwi hune ra sedza na khaedu khulwane hune ra tea u difara sa mirado yone yone ya ANC vhane vha ita nga hune vha kona u tsireledza vhuvha ha ANC, vhuthihi na nyandano.
National General Council yo ri nea zwinzhi zwine ra tea u ita. Yo sumbedza ndila siani la thavhanyiso ya mvusuludzo na mvelaphanda. Yo ri nea mushumo wa u shuma nga vhudiimiseli u itela khwathiso ya mulanga wa vhathu u vhona uri zwo bulwaho nga Freedom Charter zwi a itwa. Yo dovha ya ri kumedza u khwathisa u shela hashu mulenzhe kha mvusuludzo ya Afrika
Yo ri humbudza uri ri tea u tsireledza vhuthihi hashu na vhuthihi ha vhashumisani (Alliance) na rine. Yo ri vhudza uri ri tea uya phanda sa nanda nthihi u shumela vhathu vha Afrika tshipembe na Afrika, na u shumisana na manwe madzangano a mvelaphanda lifhasini lothe.
Khunyeledzo ya mushumo washu kha uno mutangano wa vhuvhili wa National General Council ndi liga la u thoma hashu u ita zwe ra tendelana zwone. Ndi a fulufhela uri a ri nga shonisi vhathu vhashu na thodea dzavho.
Ndi amba ndo imela Khorotshitumbe ya Lushaka uri vharumelwa ri tama vha tshi vha na lwendo lwa vhudi lwa u humela hayani. Ndi dovha nda amba uri ino National General Council ya vhuvhili yo bvalwa.
Amandla! Maanda!